أمرت جهات التحقيق بإحالة سيدة لـلمحاكمة الجنائية"، في اتهامها بـ الجمع بين زوجين، بعد بلاغ من زوجها العرفي، بزواجها من رجل آخر رسميًا، رغم استمرار زواجهما، بالزقازيق في محافظة الشرقية. 

وأضاف الشاكي في أقواله أمام جهات التحقيق أنه عاش مع زوجته، التي تعمل باحثة بإحدى مراكز البحوث، حياة زوجية مستقرة، قبل أن يفاجأ بارتباطها بشخص آخر، الأمر الذي دفعه إلى تحرير المحضر والمطالبة بالتحقيق في الواقعة، والوقوف على مدى صحة المستندات الخاصة بالزيجات الواردة بالأوراق.

وجاءت أقوال الزوج بالمحضر كالتالي:

س: ما تفاصيل شكواك تحديدًا؟

ج: اللي حصل إني تزوجت من جيهان بتاريخ 2024/2/12 زواجًا عرفيًا في مكتب محامٍ، ويوجد شهود على العقد، واستمرت العلاقة بيننا، وأخذنا شقة سكنية في حدائق أكتوبر وكنا مقيمين فيها، وكنا نتقابل يومين أو ثلاثة على حسب ظروفي وظروفها، وفي يوم قالت إن ابنها عرف إنها متزوجة عرفيًا، وهي قالت لابنها إني طلقتها، واستمرت العلاقة بيننا وحصل حمل، وساعتها اتفقنا على الطلاق.

وهي قالت لي إنها قطعت ورقة الزواج العرفي اللي بينا، وقالت لي إنها حامل، ولما أهلها عرفوا إنها حامل وحصل خلاف بينها وبين أهلها، ساعتها بعتت لي رسالة صوتية قالت فيها: «لو رنيت عليك مرة واحدة يبقوا عايزين يطلقونا من بعض، ولو رنيت عليك كتير يبقوا عايزين نكتب رسمي علشان ياخد العيل».

بعدها عرفت إنها عملت عملية إجهاض ونزلت اللي في بطنها، واستمرت العلاقة الزوجية بينا عادي، ولكن بدأت تعمل معايا مشاكل وتطلب الطلاق، وتاني يوم نتصالح، لغاية يوم 2024/12/7 كانت موجودة معايا في الشغل وكانت بايتة معايا في شقتي لمدة ثلاثة أيام، وبعدها لقيتها اختفت ومش عارف هي فين، وحاولت أتواصل معاها بس مش عارف، وفي يوم 2024/12/20 تقريبًا لقيتها بتتواصل معايا، وبعتت لي رسالة في 2024/12/17 تطلب مني الطلاق، واستمرت العلاقة بيننا بعد كدة لغاية تاريخ 2025/4/18، بعتت لي رسالة بتقول لي فيها: «أنت جوزي وحبيبي». 

ساعتها أنا شكيت فيها؛ لأن الخلافات بقت كثيرة ودخل الشك بيننا، وفي شهر أكتوبر 2025 كانت سافرت السعودية وقالت إنها مسافرة مع أخوها. وفي 2025/10/2 حصلت خناقة بينا؛ لأنها رفضت إني أعاشرها معاشرة الأزواج، وبعدها مشيت. 

وأنا بعدها قلت لها: «أنا فضيت أوضة النوم وقلت لها إني هتجوز غيرها».

وفي 2025/12/28 لقيت حد بعت لي رسالة فيها صورة عقد زواج رسمي بين ج وم. اتصلت بيها بعد ما شافت الرسالة، أنكرت وقالت: «محصلش»، وواحد من زمايلها في الشغل قال لي إنها جت ومعاها واحد وقالت إنه جوزها. 

أنا بعدها شكيت في الموضوع وبدأت أدور على الحقيقة، لغاية ما عرفت بيت ماجد زوجها، وهي عرفت إني أنا عرفت، فاتصلت عليَّ وقالت لي: «لا تفضحني ونلم الموضوع»، ولكنها بعد كدة هددتني بمراتي، إنها تعرف مراتي وأهلي، وفعلًا عرفت مراتي، هي قالت لي إنها اتصلت بي وقالت لي: «أنت فضحتني»، وأنا قلت لها: «وحدي الله ونحاول نحل الموضوع».

وقلت لها: «ألف مبروك وبالرفاء والبنين»، وده علشان أعرف آخد حقي بالقانون، بعد كده أخدت الإجراء القانوني وقدمت فيها شكوى، وده اللي حصل. 

س: ما هي طبيعة علاقتك بالمتهمة؟

ج: هي زوجتي، وفيه بيننا عقد زواج عرفي.

س: هل ما زالت علاقة الزوجية قائمة فيما بينكما؟ 

ج: أيوه.

س: ومتى بدأت علاقة الزوجية فيما بينكما؟ 

ج: هي من تاريخ 2024/2/12. 

س: وما هو عنوان مسكن الزوجية الخاص بكما؟

ج: في عمارة في كومبوند حدائق أكتوبر. 

س: وهل تقيمان بذلك المسكن إقامة دائمة؟ 

ج: أيوة، كنا مع بعض، بس مش طوال الأيام، كانت بتيجي كل ما يكون عندها شغل في القاهرة، يعني ممكن يومين أو ثلاثة في الأسبوع لحد 2025/10/3، وبعد كدة هي ما جاتش الشقة تاني.